01-09-2010 09.00
Jóanis Erik Køtlum settur sum virkandi sjúkrahússtjóri.Jóanis Erik Køtlum settur sum virkandi sjúkrahússtjóri
Heilsumálaráðið hevur sett Jóanis Erik Køtlum sum virkandi sjúkrahússtjóra á Landssjúkrahúsinum inntil nýggjur sjúkrahússtjóri verður settur. Jóanis Erik er 44 ára gamal og útbúgvin cand.merc.
Jóanis Erik Køtlum var sjúkrahússtjóri á Landssjúkrahúsinum árini 2001- 2002 og hevur síðani 2002 verið ráðgevi í Heilsumálaráðnum. Seinastu árini hevur Jóanis Erik havt strategisku ábyrgdina fyri Talgildu heilsuskipanini (THS), sum er tikin í nýtslu í sjúkrahúsverkinum og hjá kommunulæknunum.
Jóanis Erik Køtlum byrjar sum sjúkrahússtjóri mánadagin 6. september 2010.
Turid Arge, sum í fyrsta umfari hevur verið virkandi sjúkrahússtjóri, heldur áfram sum deildarstjóri í Heilsumálaráðnum.
1. september 2010
Heilsumálaráðið
| | | 24-08-2010 10.00
Allan Skaalum fer úr starvinum sum sjúkrahússtjóri á Landssjúkrahúsinum.Allan Skaalum fer úr starvinum sum sjúkrahússtjóri á Landssjúkrahúsinum
Sjúkrahúsleiðslan hevur í morgun kunnað depilsleiðslur og samstarvsnevnd um niðanfyristandandi:
"Allan Skaalum fer úr starvinum sum sjúkrahússtjóri á Landssjúkrahúsinum.
Grundað á fíggjarligu støðuna og gongdina á Landssjúkrahúsinum eru Heilsumálaráðið og Allan Skaalum blivin samd um, at Allan Skaalum fer úr starvinum sum sjúkrahússtjóri.
Orsøkin til hetta er, at Aksel V. Johannesen, landsstýrismaður ikki longur hevur álit á, at Allan Skaalum sum sjúkrahússtjóri megnar at stýra útreiðslunum á nøktandi hátt.
Allan Skaalum er ósamdur í, at hann kann lastast fyri ta fíggjarligu støðu sum er íkomin og sum hevur ført við sær, at søkt er um eykajáttan, men sum støðan er, ynskir hann kortini at gera eina fráfaringaravtalu.
Landsstýrismaðurin hevur avgjørt, at Turid Arge, deildarstjóri í Heilsumálaráðnum verður virkandi sjúkrahússtjóri í fyrsta umfari."
Sjúkrahúsleiðslan
Tummas í Garði, Naina Túgvustein, Bente Wennerberg.
| | | 23-08-2010 18.59
Svar uppá atfinningar mótvegis fíggjarstýringini á Landssjúkrahúsinum.Svar uppá atfinningar mótvegis fíggjarstýringini á Landssjúkrahúsinum
Landssjúkrahúsið fer her at svara teimum atfinningunum, sum eru settar mótvegis Landssjúkrahúsinum av formanninum í Trivnaðarnevndini.
Tey punkt, sum formaðurin í Trivnaðarnevndini tekur fram, eru:
1. Skil má koma á fíggjarstýringina
2. Sjúkrahúsverk, sum ikki fungerar alt árið
3. Landssjúkrahúsið hevur fingið alt, sum Landssjúkrahúsið hevur biðið um. Kortini strekkja pengarnir ikki til!
4. Ov nógvir pengar brúktir í systeminum, áðrenn teir koma til sjúklingin
5. Bert eykajáttan, um tað kemur sjúklinginum til góðar
Sí meira í hjálagda PDF fíli við at trýsta á yvirskriftina.
| | | 23-08-2010 16.30
Yvirlýsing.Yvirlýsing
Hendan yvirlýsingin er send fjølmiðlunum, Aksel V. Johannesen, landsstýrismanni og Poul Geert Hansen, aðalstjóra:
Ein fráboðan frá einari samdari Samstarvsnevnd, umboðandi øll starvsfólk á Landssjúkrahúsinum. Við hesi yvirlýsing vilja vit átala framferðarháttin frá politiska myndugleikanum mótvegis sjúkrahússtjóranum á Landssjúkrahúsinum.
Vit vilja staðiliga afturvísa pástandin um manglandi fíggjarstýring á Landssjúkrahúsinum. Tað eru fastir mánaðarligir fíggjarfundir, har rakstur og lønir verður viðgjørt. Til dags dato heldur játtanin á lønarkontoini, men sum gongdin líður, vænta vit undirskot uppá 10 mió av samlaða raktrinum serliga orsakað av heilivági, men hetta hava vit vænta, og var Heilsumálaráðið fyrstu ferð kunnað um hetta longu í mars mánaða.
Allan Skaalum hevur síðani hann bleiv stjóri á Landssjúkrahúsinum vent gongdini positivt, hann er avhildin og sera dugnaligur og hevur røkt sína uppgávu fyrimyndarligt, bæði sum stjóri og sum persónur.
Til teir politikarar sum pástanda at Landssjúkrahúsið hevur fingið ta játtan ið biðið er um, kann hetta staðiliga afturvísast. Umbøn um játtan til Landssjúkrahúsið verður skarvað hvørt ár við 2 sifraðum mió upphæddum av Heilsumálaráðnum, áðrenn farið verður í fíggjarnevndina.
Vit hava hildið játtanina sum nú er, tí at vit hava ein dugnaligan stjóra og eina góða fíggjarstýring. Vit meta ikki at ein nýggjur stjóri er nøkur loysn.
Soleiðis sum støðan er, óttast vit framtíðina og kann ein uppsøgn av stjóranum niðurbróta tað góða samstarv og trivnaðin, sum er uppbygt ímillum leiðslu og starvsfólk.
Tórshavn, 23. august 2010
Samstarvsnevndin á Landssjúkrahúsinum
| | | 10-08-2010 11.00
Temadagur "Gransking og sjúkrarøkt í Føroyum'.Temadagur "Gransking og sjúkrarøkt í Føroyum'
 Kom og hoyr meira. Temadagur verður í veitsluhøllini á Landssjúkrahúsinum fríggjadagin 3. september frá kl. 9:00-15:00
Sjúkrahússtjórnin fegnast um, at fleiri sjúkrarøktarfrøðingar nema sær alsamt størri vitan og førleika innan heilsugransking.
Landssjúkrahúsið ynskir at varpa ljós á gransking innan sjúkrarøkt, sum í Føroyum er eitt relativt nýtt øki. Skipað verður fyri einum granskingardegi, ið er fyri heilsustarvsfólk, sum ætla sær at granska ella taka lut í granskingarverkætlanum og/ella forkanningum.
Millum fyrilestrahaldararnar verður Ingrid Egerod, Seniorforsker, cand.cur. ph.d., sum starvast á UCSF (Universitetshospitalernes Center for Sygepleje- og omsorgsforskning) í Danmark. Ingrid fer at greiða frá og geva íblástur til, hvussu ein kann fara til verka.
Temadagurin er ókeypis. Bjóðað verður kaffi/te og frukt fyrrapart og seinnapart. Í døgurðasteðginum er møguligt at keypa ein bita í kantinuni.
Sjúkrarøktarfrøðingar og onnur sum vísa hesum áhugað, verða biðin um at melda til luttøku innan fríggjadagin 27. august.
Tilmelding: send ein teldupost til Hjørdis Zachariassen, lshjoza@ls.fo ella ring tlf. 304500 lokal 1006
Vegna sjúkrahúsleiðsluna
Naina Túgvustein
Varastjóri
Sí eisini skrá fyri dagin - pdf skjal
| | |
|
|
